د کابل پولي تخنيک پوهنتون د لوړو زده کړو وزارت د اعتبار ورکولو اکاډميک سند ترلاسه کړ
د کابل پولي تخنیک پوهنتون د کیفیت د تضمین او اعتبار ورکولو د یوولس ګونو معیارونو په تطبیق سره د لوړو زده کړو وزارت څخه د اعتبار ورکولو د سند پر اخيستو بریالی شو.
په هغه غونډه کې چې په دې اړه په یاد پوهنتون کې دایره شوې وه، د لوړو زده کړو وزیر ډاکټر عباس بصیر د مشرتابه پلاوي ته د مبارکۍ ترڅنګ؛ د دې پوهنتون استادان او کارمندان د اعتبار ورکولو د سند د ترلاسه کولو له مخې، د هېواد د تحصیلي بنسټونود کیفیت په لوړولو کې اغېزمن وبلل.
ډاکټرعباس بصیر وویل:"په تحصیلي نظام کې د کیفیت تضمین یو له سترو خنډونو څخه دی او زه ډاډه یم چې د دې پروسې په تطبیق سره به د هیواد د تحصیلي نظام د کیفیت لوړولو پر لوري ګامونه پورته کړو."
هغه څرګنده کړه چې د افغانستان پوهنتونونه د نړۍ د پوهنتونو په جدول کې په ډېره ټیټه کچه کې دي چې د پرله پسې هڅو او پوهې په ترلاسه کولو له دې حالت څخه وتلی شي.
د لوړو زده کړو وزیر زیاته کړه؛ له بده مرغه ډيرې څيړنې چې په افغانستان کې شوې دي د نورو مراجعو د پالیسۍ پر بنسټ دي چې؛ زموږ د نړیوالو همکارانو په واسطه ترسره شوي دي.
له دې پلوه به په راتلونکې کې د لوړو زده کړو وزارت یوه برنامه دا وي؛ چې د هېواد په کچه د علمي څيړنو لپاره فرصتونه برابر کړو او وکولای شو د پالیسۍ له نظره نور سکټورونه تغذیه کړو.
وروسته د لوړو زده کړو وزارت علمي مرستيال پوهنمل عبدالتواب بالا کرزي پولي تخنیک پوهنتون ته د اعتبار ورکولو د سند ورکړه؛ د یاد بنسټ د غړو د شپو او ورځو زیار ګاللوذپایله وبلله او ويې ویل چې د کیفیت د تضمین بهير نږدې یوه لسیزه دمخه پیل شوى او د زیاتو ستونزو سره سره؛ د وخت د مسوولانو په هڅو سره دغې پروسې وکولای شول خپل دریځ د هيواد په تحصیلي نظام کې تثبیت کړي.
پوهنمل عبدالتواب بالا کرزي د کیفیت د تضمین او اعتبار ورکولو د یوولس ګونو معیارونو د تشریح او توضیح ترڅنګ زیاته کړه؛ چې د کیفیت د تضمین پروسه هرکال تطبیقیږي ترڅو تحصیلي بنسټونه د تېر اعتبار د ساتنې ترڅنګ په وروستیو پړاوونوکې هم خپلې هڅې په دوامداره توګه جاري وساتي.
همداراز د پولي تخنیک پوهنتون ريیس پوهنوال عبدالرشید اقبال د لوړو زده کړو وزارت د رهبرۍ اوهغو استادانو له هڅو ستاینه وکړه؛ چې د اعتبار ورکولو د درېیم پړاو په اجرا کولو کې يې همکاري او هڅې کړي دي.
هغه هیله وښوده، چې د دې سند په ترلاسه کولو سره به په اکاډمیکه برخه کې د کابل پولي تخنیک پوهنتون د دې سند په ترلاسه کولو سره د لیسانس، ماسټرۍ او دکتورا په برخو کې د برنامو جوړولو او پرمختیا صلاحیت هم تر لاسه کړي.
د ده په وینا د کابل پولي تخنیک پوهنتون به هڅه وکړي چې د دې سند د ساتنې ترڅنګ به د اعتبار ورکولو د نړیوال سند د اخيستو هڅې وکړي او د هيواد په پرمختګ کې به خپل رول ادا کړي.
د یادونې وړ ده چې تر دې مخکې هم ۶ دولتي تحصیلي بنسټونه او ۴ د خصوصي لوړو زده کړو بنسټونه توانیدلي چې د لوړو زده کړو وزارت د اعتبار ورکولو سند ترلاسه کړي.
