د هېواد د پوهنتونونو د فارمسي او وترنري پوهنځيو د تحصیلي نصاب د بیاکتنې او پراختیا اول دور کلسټر په بریالۍ توګه پای ته ورسېد
۱۴۰۰کال، د کب ۱۹مه
د هېواد د پوهنتونونو د فارمسي او وترنري پوهنځيو د تحصیلي نصاب د بیاکتنې او پراختیا اول دور کلسټر په بریالۍ توګه پای ته ورسېد.
د دغه کلسټر په پای ناسته کې د لوړو زده کړو سرپرست وزیر مولوي عبدالباقي حقاني د یاد کلسټر له ګډونوالو د مننې تر څنګ وویل، چې د بې کیفیته وارداتي درملو د مخنیوي په پار هڅه کوو، چې په کور دننه متخصص فارمسسټان تربیه او باکیفیته درمل تولید کړو. نوموړي د مالدارۍ او په هېواد کې یې اقتصادي ارزښت ته په اشارې سره وویل، چې د سالم حیوان سالم پیداوار وي او که مو حیوانات ناروغ وي، نو محصولات به یې هم بې کیفیته او د کارونې وړ نه وي.
وروسته د وترنري پوهنځی د تحصیلي نصاب د بیاکتنې او پراختیا کلسټر د ګډونوالو په استازيتوب پوهنوال دوکتور اسدالله صمدي او د فارمسي پوهنځی په استازیتوب پوهنیار زیارمل تیرزي د یاد ۵ ورځني کلسټر د پایلو په اړه خپل راپورونه وړاندې کړل.
