د لوړو زده کړو سرپرست وزیر الحاج مولوي عبدالباقي حقاني د اسلامي همکاریو سازمان (OIC) له پلاوي سره وکتل.
۱۴۴۳/۱۱/۲۶
۱۴۰۱/۴/۵
د لوړو زده کړو سرپرست وزیر الحاج مولوي عبدالباقي حقاني د اسلامي همکاریو سازمان (OIC) له پلاوي سره وکتل.
د لوړو زده کړو سرپرست وزیر د اسلامي همکاریو سازمان پلاوي ته ښه راغلاست وویل او له هغوی سره یې دې لیدنې پر مهال وویل، چې هر هېواد بېل دیني او ملي ارزښتونه لري او د خپلو ارزښتونو په پام کې نیولو سره خپلې چارې پر مخ بیایي.
الحاج مولوي عبدالباقي حقاني د اسلامي همکاریو سازمان له پلاوي، چې عربي، اسیایي او افریقایي علماوو پکې شتون درلود، وغوښتل چې اسلامي هېوادونه په تحصیلي او نورو برخو کې له افغانستان سره همکاریو ته وهڅوي. نوموړي په ننګرهار کې د اسلامي پوهنتون د ژر کار پیلولو او د افغان نړیوال پوهنتون د اکمال په برخه کې له هغوی څخه د مرستو غوښتنه وکړه.
د لوړو زده کړو سرپرست وزیر وویل، چې افغانستان تازه له جګړو راوتلی، نو د نړیوالو سازمانونو او هېوادونو په ځانګړي ډول اسلامي سازمانونو مرستو ته اړتیا لري.
د اسلامي همکاریو سازمان د پلاوي مشر دوکتور قطب مصطفی سانو وویل، کله چې موږ په افغانستان کې د تعلیم او تحصیل جریان له نیږدې ولید، نو دا راته ثابته شوه چې په بهر کې میډیا ناسم تبلیغات کوي، دغه راز نوموړي له افغانستان پر مرستو د ټینګار تر څنګ، د افغانستان د تحصیلي نظام ملاتړ وکړ.
