د لوړو زده کړو سرپرست وزیر د تدریسي روغتونونو په برخه کې د ګډې همکارۍ په پار، د عامې روغتیا له سرپرست وزیر سره وکتل.
په یاده لیدنه کې، چې د عامې روغتیا په وزارت کې ترسره شوه، د لوړو زده کړو سرپرست وزیر شیخ الحدیث مولوي نداء محمد ندیم صاحب له عامې روغتیا وزارت سره د طب په برخه کې پر ګډو همکاریو ټينګار وکړ او د عامې روغتیا له سرپرست وزیر څخه یې وغوښتل چې د طب پوهنځيو د محصلینو لپاره د عملي زده کړو او تدریسي روغتونونو د چارو د ښه والي په برخه کې همکاري ورسره وکړي.
دغه راز د عامې روغتیا سرپرست وزیر ډاکټرقلندرعباد د هېواد د طبي سکټور د پیاوړتیا په برخه کې له لوړو زده کړو وزارت سره ګډ کار ته تیاری وښود او ویې ویل چې لوړو زده کړو وزارت د عامې روغتیا لپاره بشري ځواک روزي.
د یادولو وړ ده چې دواړو اړخونو د هېواد د روغتیایي سیسټم د پرمختګ، ځان بساینې، کیفیت لوړونې او د هېواد په داخل کې د ناروغانو د درملنې پر غوره لارو چارو خبرې وکړې او نظرونه یې سره شریک کړل.
