په مالیې وزارت کې د ګمارنې په موخه د مرکز د غوره پوهنتونونو له ۳۲۰ ممتازو فارغانو څخه ازموینه د لوړو زده کړو علمي معین په شتون کې واخیستل شوه.
په مالیې وزارت کي د مسلکي کدرونو د جذب، کار اهل کار ته د سپارلو او د یوې تلپاتي مسلکي ادارې د رامنځته کولو په موخه د مرکز کابل د غوره پوهنتونونو د (۱۴۰۰ او ۱۴۰۱) هجري لمریز کلونو له (۳۲۰) تنو ممتازو فارغانو څخه ازموینه واخیستل شوه.
په یادو مراسمو کې د مالیې وزیر الحاج ملا محمد ناصر اخند فارغ شویو محصلینو ته په خطاب کي وویل، چې هیواد ستاسو په څېر ممتازو او استعداد لرونکو ځوانانو ته اړتیا لري؛ تر څو د خپلې پوهې او وړتیا په مټ د هیواد د ابادۍ او پرمختګ لپاره صادقانه هڅې وکړي.
ورپسې د لوړو زده کړو وزارت علمي معین دوکتور لطف الله خیرخواه وویل، چي د مالیې وزارت په غوښتنه یې د مرکز ممتاز فارغین په دغه وزارت کي د ګمارني په موخه معرفي کړي، چي د ازموینې له شفافي پروسې وروسته به بریالي کسان د دغه وزارت په خالي بستونو کي په دندو وګمارل شي.
دوکتور خیرخواه زیاته کړه، چي دغه پروسه د هر ډول قومي، ژبني او سمتي تبعیض پرته په پوره روڼتیا سره د وړتیا اصل ته په کتو ترسره کېږي او په مالیې وزارت کي د ګمارنې یواځنۍ معیار يې د معتبرو پوهنتونونو د ممتازو محصلینو لپاره په دغه ازموینه کي بریالیتوب دی.
د ازمویني ګډونوالو هم د ازمویني د رڼې پروسې له امله خوښي څرګنده کړه او د مالیې وزرات او لوړو زده کړو وزارت له رهبرۍ او مسؤلینو څخه یې مننه وکړه، چي فارغانو ته يې د دندو فرصتونه برابر کړي دي.
۱۵/۱/۱۴۴۵ هـ ق ۱۱/۵/۱۴۰۲ هـ ش ۲/۸/۲۰۲۳ م
