د لوړو زده کړو سرپرست وزیر د مرکزي خصوصي تحصیلي بنسټونو له رئیسانو سره وکتل او د هغوی ستونزې او وړاندیزونه یې واورېدل.
د لوړو زده کړو سرپرست وزیر شیخ الحدیث مولوي نداء محمد ندیم، په داسې حال کې چې د مرکزي ادارو یو شمېر رئیسانو هم حضور درلود، د مرکز خصوصي پوهنتونونو / مؤسسو له مسؤلینو سره په ناسته کې د اصولو مراعاتولو، کیفیت لوړولو او علمي ډګر د پرمختګ لپاره لازمې لارښوونې او سپارښتنې وکړې او ترې ویې غوښتل چې په خپلو پوهنتونونو او مؤسسو کې د عصري زده کړو تر څنګ، د شریعت اصول او اساسات مراعات کړي.
همدارنګه د دغه وزارت د څارنې او ارزونې ټيمونو هغه راپورونه او نیمګړتیاوې ورسره شریکې شوې، چې د ولایتي خصوصي تحصیلي بنسټونو نظارت څخه یې تر لاسه کړې وې، تر څو خپلو چارو ته متوجه شي او د ستونزو مخنیوی وشي.
دغه راز د لوړو زده کړو سرپرست وزیر د خصوصي تحصیلي بنسټونو له استازو وغوښتل چې خیالي محصلین ونه لري، با استعداده استادان وګماري او په خپلو ټولو چارو کې ملي او اسلامي ارزښتونو ته پاملرنه وکړي.
وروسته د خصوصي پوهنتونونو / مؤسسو استازو د لوړو زده کړو له سرپرست وزیر سره خپلې ستونزې او وړاندیزونه شریک کړل او د خپلو نیمګړتیاوو د ډکولو ډاډ یې ورکړ.
