د HEDP دفتر د تېرو شپږو مياشتو کړنو د ارزونې په موخه غونډه وشوه
د HEDP دفتر د تېرو شپږو میاشتو د فعالیتونو او د یاد دفتر د شپږو راتلونکو میاشتو ارزونه د لوړو زده کړو وزارت د مالي او اداري معین او نړیوال بانک د استازو ترمنځ د یوې ناستې په ترڅ کې د ویدیو کنفرانس له لارې نهايي شوه. په دې ناسته کې د لوړو زده کړو وزارت د مالي او اداري چارو معین سربېره د لوړو زده کړو وزارت د انکشافي برنامو د دفتر رئیس، د وزارت د مرکزي ادارو یو شمېر رئیسانو او د نړیوال بانک د پاکستان،امریکا او افغانستان استازو ګډون درلود.
نور احمد درویش د نړیوال بانک د مرستو څخه د قدردانۍ ترڅنګ په هیواد کې د لوړو زده کړود ځواکمنتیا او د پرمختیايي پروژو د تطبیق لپاره په لا زیاته همغږۍ ټینګار وکړ. همداراز د لوړو زده کړو د پرمختیايي برنامو د انکشاف، پلان، پالیسۍ او تقنین،د معلوماتي ټکنالوژۍ او اداري او زیربناوو رئیسانو د لوړو زده کړو د ترسره شوو فعالیتونو په اړه خبرې وکړې او دراتلونکو شپږو میاشتو لپاره د دوی د اړتیاوو په اړه د نړیوال بانک له استازو سره معلومات شریک کړل.
بالمقابل د نړیوال بانک استازو چې له بېلابېلو هېوادونو په انلاین توګه نښلول شوي وو، د لوړو زده کړو وزارت د تېرو شپږو میاشتو فعالیتونه مثبت اود ستاینې وړ و ارزول.
هغوی د لوړو زده کړو وزارت د راتلونکو شپږو میاشتو د اړتیاوو تر اوریدلو وروسته ژمنه وکړه، څو د مطرح شوو اړتیاوو د لیرې کولو او د افغانستان د تحصیلاتو د نظام د ځواکمنولو لپاره په ځانګړې توګه د قرنطین په بهیر کې د آنلاین سیستم د زده کړې، د جندر پالیسۍ د تطبیق اود زیربنايي پروژو د بشپړولو په برخو کې د همکارۍ ډاډ ورکړ.
د یادونې ده چې له دې وړاندې هم څو ځله د لوړو زده کړو وزارت د مرکزي رئیسانو او د نړیوال بانک د استازو ترمنځ د تیرو شپږو میاشتو د برنامو او راتلونکو شپږو میاشتو د طرحو او پروګرامونو په اړه بحث او د نظر تبادله شوې ده.
