د لوړو زده کړو وزارت پلاوي د کابل پولي تخنیک پوهنتون له استادانو او کارکوونکو سره ولیدل
د لوړو زده کړو وزارت پلاوي د کابل پولي تخنیک پوهنتون له استادانو او کارکوونکو سره د تحصیلي حالت ښه والي په موخه، مشورتې ناسته تر سره کړه.
په دغه ناسته کې د لوړو زده کړو وزارت د نشراتو، اطلاعاتو او عامه اړیکو د ریاست سرپرست دوکتور دلاور سیلاب، شیخ الحدیث مولوي شاه محمد، د لوړو زده کړو وزارت فوق العاده استازی انجنیر زیارمل خطاب، د کابل پولي تخنیک پوهنتون رییس پوهنوال دیپلوم انجنیر عبدالرشید اقبال، د دغه پوهنتون مرستیالانو، په پولي تخنیک پوهنتون کې د اسلامي امارت د شورا مسوول انجنیر اسدالله عمر، د پوهنځیو رییسانو، استادانو او کارکوونکو ګډون کړی وو.
په پیل کې د کابل پولي تخنیک پوهنتون رییس عبدالرشید اقبال مېلمنو ته ښه راغلاست وویل او د پولي تخنیک پوهنتون د منسوبینو له لوري یې په اسلامي روحیه د هېواد د بچیانو د روزنې ډاډ ورکړ.
وروسته دوکتور دلاور سیلاب په خپلو خبرو کې افغانستان د اسلامي نړۍ زړه وباله، د اسلامي خاورو موقعیت یې د جغرافیې له پلوه او مسلمانانو لپاره غوره یاد کړ او ویې ویل چې مسلمانان کولی شي د اسلامي امت د پرمختګ لپاره له شته امکاناتو په لوړو کچه استفاده وکړي.
وروسته شیخ الحدیث مولوي شاه محمد د عمومي عفوې، عدالت، برابرۍ، د پخواني اسلامي امارت د پالیسیو، د افغانستان تاریخ او حاکمانو او په پخوانیو پړاوونو کې د هېواد د نه پرختګ د عواملو په اړه خبرې وکړې او د دې هیله یې څرګنده کړه، چې اسلامي امارت به خپل هر اړخیز پروګرامونه عملي کړي، څو د افغانانو د سوکالۍ لامل وګرځي.
په پای کې د کابل پولي تخنیک پوهنتون په استازیتوب پوهنمل سعیدالرحمن احساس ډاډ ورکړ، چې د اسلامي امارت د پروګرامونو په پلي کولو کې به هېڅ ډول هڅې ونه سپموي.
هغه همدارنګه د خدمت او هېواد د انجنیرانو د روزنې په برخه کې د پوهنتون علمي ظرفیتونه او اسانتیاوې ګټورې وبللې او د افغانستان له اسلامي امارت څخه یې وغوښتل، چې په دغه برخه کې له کابل پولي تخنیک پوهنتون سره مرسته وکړي.
