د دیني جامعاتو او تخصصاتو د جدید الشمول فاضلانو لپاره د تخصصاتو برنامو، پالېسۍ او تګلارې معرفي کولو غونډه ترسره شوه.
۱۴۴۳/۱۱/۲۶
۱۴۰۱/۴/۵
د دیني جامعاتو او تخصصاتو د جدید الشمول فاضلانو لپاره د تخصصاتو برنامو، پالېسۍ او تګلارې معرفي کولو غونډه ترسره شوه.
په یاده غونډه کې د لوړو زده کړو سرپرست وزیر الحاج مولوي عبدالباقي حق اني، د لوړو زده کړو علمي معین دوکتور لطف الله خیرخوا، ددغه وزارت مالي او اداري معین حافظ مولوي محمد حامد حسیب، د خصوصي محصلانو چارو رئیس سید اسماعیل روحاني، د یاد وزارت رئیسانو، مسؤلینو او د دیني جامعاتو د پنځو تخصصاتو برنامو فاضلانو ګډون کړی وو.
په دغې راټولېدنه کې د لوړو زده کړو سرپرست وزیر الحاج مولوي عبدالباقي حق اني د علم او مدرسې پر اهمیت د قران او حدیث په رڼا کې معلومات وړاندې کړل او فاضلان یې خپلو مسؤلیتونو ته متوجه کړل.
سرپرست وزیر د خپلې وینا پرمهال زیاته کړه، " چې اوسنی نظام د ۴۳ کلونو شهادتونو په پایله کې راغلی دی، د جهاد ډګر مو ګټلی اوس باید د تحصیل ډګر هم وګټو؛ ترڅو په دیني او دنیاوي برخو کې د مسلمانانو ضرورتونه حل شي."
همدارنګه د لوړو زده کړو وزارت علمي معین دوکتور لطف الله خیرخوا جدید الشمول فاضلان زده کړو ته تشویق، حاضرۍ ته پر پام او د اسلامي نظام پر شتون او پر دغه نعمت شکر ویستلو ته وهڅول.
دغه راز د لوړو زده کړو مالي او اداري معین حافظ مولوي محمد حامد حسیب تخصصات په یوه ټولنه کې اړتیا یاده کړه او ویې ویل، " موږ باید هره برخه کې متخصصین ولرو؛ ترڅو د مسلمانانو اړتیاوو ته رسېدنه وشي."
همداشان د دیني جامعاتو او تخصصاتو لوی ریاست د تخصصاتو رئیس شیخ عبدالمالک نیازي جدید الشمول فاضلان متقابل احترام، ښې رویې او ورته نورو مسایلو ته متوجه کړل او په همدې تړاو تیار کړي معلومات یې له ګډونوالو سره شریک کړل.
