د «افغانستان د سیاحتي جاذبو ملي کنفرانس» دویمه ورځ د علمي-څېړنیزو مقالو په وړاندي کولو سره پای ته ورسېده.
په بدخشان پوهنتون کې دغه درې ورځني کنفرانس ته د بېلابېلو تحصیلي بنسټونو استادانو په دریو ژبو ۱۰۸ علمي-څېړنیزې مقالې چمتو کړي وې، چې د څلویښتو لومړی ګټګوري مقالو څخه نن ورځ ۱۳ مقالې وړاندې شوې، چې د سیاحتي ځایونو پر ارزښت، معرفي کولو، څېړلو او د سیاحت په برخه کې د ستونزو او حللارو پېژندلو په برخه کې وې.
بدخشان پوهنتون په ۱۳۷۷هـ.ش کال کې تاسیس شو، چې اوسمهال نهه پوهنځي لري. د دغه پوهنتون د مسولینو په وینا د سیاحتي جاذبو کنفرانس موخې؛ سیاحتي صنعت ته وده ورکول، د افغانستان سیاحتي جاذبو یا ځایونو معرفي او د سیاحت په برخه کې اړونده وزارتونو ته د پالیسیو او طرحو لپاره دغه څېړنیزې مقالې سپارل دي.
د یادونې وړ ده چې د دغه کنفرانس په لومړی ورځ د ا.ا.ا د کابینې غړو هم ګډون کړی وو او په افغانستان کې د سیاحت د ارزښت پر بېلابېلو اړخونو او په دغه برخه کې د دولت پر ژمنتیا یې خبرې وکړې.
ټاکل شوې چې سبا به پاتې برخه مقالې وړاندې شي او د پریکړه لیک په خپرولو او د ستاینلیکونو په ویشلو سره به دغه درې ورځنی کنفرانس پای ومومي.
