د افغان نړيوال پوهنتون د طب، انجنیرۍ او زراعت پوهنځیو د فوق لېسانس پروګرامونو دوه ورځنی کلسټر پای ته ورسېد
شنبه، ۱۴ کب ۱۴۰۰
د افغان نړيوال پوهنتون د طب، انجنیرۍ او زراعت پوهنځیو د فوق لېسانس پروګرامونو دوه ورځنی کلسټر پای ته ورسېد
په همدې موخه د لوړو زده کړو وزارت د غونډو په تارلار کې جوړو شوو مراسمو کې د لوړو زده کړو سرپرست وزیر مولوي عبدالباقي حقاني، د لوړو زده کړو وزارت علمي معین دوکتور لطف الله خیرخوا، د وزارت یو شمیر رئیسانو، د پوهنتون استادانو او بېلابېلو مسؤلینو ګډون کړی وو.
په یاده غونډه کې د لوړو زده کړو سرپرست وزیر مولوي عبدالباقي حقاني د یاد کلسټر غړو څخه د مننې ترڅنګ وویل: «
د تاریخ په اوږدو کې ځینو خلکو په علمي ډګر کې داسې خدمتونه کړي چې تر ننه پورې ترې نور خلک ګټه پورته کوي او هغوی په نیکو نومونو سره یادوي.
داچاره موږ ته دا درس راکوي، چې که یو انسان خپل وخت قیمتي کړي؛ نو د مسلمانانو اړتیاوې به پوره شي او نوی نسل به د تل لپاره دعاء ورته کوي.»
د لوړو زده کړو وزارت علمي معین دوکتور لطف الله خیرخواه وویل: « د تېرو شاوخوا ۴۰ کالونو راهیسي د نصاب تجدید برخه کې داسې کوم اقدام نه و شوی، موږ به په دې نصاب کې د هېواد اړتیاوو سره سره د سیمې هېوادونو اړتیاوې هم نظرکې نېسوو.»
نوموړی دغه راز د استادانو له زحمتونو مننه وکړه او ویې ویل: « استادان باید په ډېر شوق، ذوق او علاقې سره په دې برخه کې لا ډېر کار وکړي، موږ داسې علماء لیدلي او یا یې په اړه معلومات لرو، چې په زندانونو، کوهي او ورته نورو ځایونو کې یې علم ته کار کړی، کتابونه یې لیکلي، نو موږ او تاسې هم باید د راتلونکي نسل سره د ښېګڼې لپاره نن زحمتونه وګالو.»
همدارنګه د تحصیلي نصاب د ملي کمیسیون غړي پوهندوی داود شاه فاروق د یاد کلسټر د کاري شېوې ، د کابل پوهنتون طب پوهنځي استاد پوهاند دوکتور محمد فرید برنایار د طب ، د کابل پولیتخنیک پوهنتون استاد پوهنوال دوکتور امان الله فقیري د انجینرۍ، د ننګرهار پوهنتون استاد پوهنمل دوکتور عصمت الله دراني د زراعت ، برخو اړوند معلومات وړاندې کړل.
دغه راز یې د طب، انجینرۍ او زراعت پوهنځیو اړوند د بېلابېلو څانګو جوړولو وړاندېزونه شریک کړل.
