د لوړو زده کړو سرپرست وزیر د جهان لوړو زده کړو مؤسسې د محصلینو په فراغت غونډه کې ګډون وکړ
د لوړو زده کړو سرپرست وزیر شیخ الحدیث مولوي نداء محمد ندیم صاحب د جهان لوړو زده کړو مؤسسې له حقوق، شرعیات، اقتصاد او کمپیوټر ساینس څانګو څخه د ۴۰۰ تنو محصلینو په فراغت غونډې کې ګډون وکړ.
په پیل کې سرپرست وزیر ټولو محصلینو او د هغوی کورنیو ته مبارکي وویله او زیاته یې کړه چې د افغانستان اسلامي امارت تاسو ته هر ډول کاري فرصتونه چمتو کوي او د لوړو زده کړو وزارت د افغان ځوانانو د عملي زده کړو او کاري فرصتونو چمتو کولو په موخه له ځینو وزارتونو سره هوکړه لیکونه لاسلیک کړي دي.
همداراز یې له خصوصي تحصیلي سکتور څخه مننه وکړه چې افغانانو ته تحصیلي خدمتونه وړاندي کوي او وویل، چې د لوړو زده کړو وزارت له خصوصي تحصیلي سکتور سره پوره همکار دی.
وروسته د جهان لوړو زده کړو مؤسسې رئیس دوکتور عبدالحکیم نوري له سرپرست وزیر څخه مننه وکړه او ټولو محصلینو ته یې مبارکي وویله او خوښي یې څرګنده کړه چې د خدمت لپاره افغان ځوانان ټولنې ته وړاندې کوي او په دې سره ناخوالي له منځه وړي.
ورپسې د کابل ولایت والي مولوي محمد قاسم خالد محصلینو ته په خطاب کې وویل، چې الله تعالی دي تاسو افغانستان ته د خدمت مصدر وګرځوي او زیاته یې کړه چې موږ هم عصري او هم دیني علومو ته اړتیا لرو.
په پای کې ټولو محصلینو ته د فراغت تصدیق پاڼې وویشل شوې.
