د لوړو زده کړو سرپرست وزیر په خپل کاري دفتر کې د پاکستان هېواد له سفیر سره وکتل.
په یاده لیدنه کې د لوړو زده کړو سرپرست وزیر شیخ الحدیث مولوي نداء محمد ندیم صاحب د پاکستان هېواد سفیر او ورسره مل پلاوي ته د ښه راغلاست ویلو ترڅنګ د دواړو هېوادونو ترمنځ د ښو او نیکو اړیکو په پاللو ټینګار وکړ او د اسلام مبارک دین کې د ګاونډي حقوقو ته اشاره وکړه.
سرپرست وزیر همداراز وویل: « افغانان په یوه سنتي او فکري ټولنه کې ژوند کوي او د ا.ا.ا تل په همدې هڅه کې دی، چې هیچا ته هم په افغانانو د فکري او فرهنګي نیوکې ځای پیدا نه کړي او په همدې موخه د اسلامي احکامو د پلي کولو هوډ لري».
د لوړو زده کړو سرپرست وزیر شیخ الحدیث مولوي نداء محمد ندیم صاحب په افغانستان کې د نړیوالو او پخوانیو حکومتونو د ظلمونو یادونه وکړه او ویې ویل چې، د بشر اوسني تش په خوله مدافعین په هغو ظلمونو چپ پاتې وو او اوس د بشر د حقوقو په نوم د افغانستان په کورنیو چارو کې د لاس وهنې هڅې کوي.
ورپسې افغانستان کې د پاکستان سفیر، دوی سره ناستې ته هرکلی ووایه، نوموړي افغانستان او پاکستان دوه دوست هېوادونه یاد کړل، چې په وینا یې دواړه هېوادونه سره ګډې پولې، دیني، مذهبي او کلتوري نېږدیوالی لري او دې ټولو ته په کتو تر بل هر چا له افغانستان سره لازمو همکاریو ته ژمن دی.
د پاکستان هېواد سفیر سره په دغه لیدنه کې د لوړو زده کړو وزارت علمي معین دوکتور لطف الله خیرخواه یاد هېواد کې د افغان محصلینو د ویزو په برخه کې د ستونزو هوارولو ترڅنګ د تدریسي روغتونونو استادانو ته د ټریننګونو او د علمي کادرونو په برخه کې د همکاریو غوښتنه وکړه.
