د لوړو زده کړو سرپرست وزیر په خپل کاري دفتر کې په افغانستان کې د جینوا کال نړیوالې مؤسسې له رئیس سره وکتل.
په پیل کې د لوړو زده کړو سرپرست وزیر شیخ الحدیث مولوي نداء محمد ندیم په افغانستان کې د جینوا کال نړیوالې مؤسسې رئیس او ورسره مل پلاوي ته ښه راغلاست وویل او په کابل، کندهار او بامیان پوهنتونونو کې یې د یادې مؤسسې له لوري استادانو ته د سیمینارونو ورکولو څخه مننه وکړه.
د لوړو زده کړو سرپرست وزیر د جینوا کال نړیوالې مؤسسې د دا ډول مرستو هرکلی وکړ او په دې برخه کې یې هغوی ته د هر ډول همکارۍ ډاډ ورکړ.
وروسته په افغانستان کې د جینوا کال نړیوالې مؤسسې رئيس فهد عباسي وویل چې موږ د افغانستان د نورو ادارو تر څنګ، په پوهنتونونو کې د ا.ا.ا له پالیسیو او د لوړو زده کړو وزارت له غوښتنو سره سم د استادانو د ظرفیت لوړونې په برخو کې سیمینارونه دایروو.
د یادونې وړ ده چې جینوا کال نړیواله مؤسسه د ملکي خلکو خوندیتوب برخو کې د عامه پوهاوي اړوند خدمتونه وړاندې کوي.
