د لوړو زده کړو وزارت او د چارو ادارې، مالیې او عدلیې وزارتونو تر منځ ناسته
د لوړو زده کړو وزارت مشرتابه پلاوي د ولسمشرۍ ماڼۍ د چارو ادارې، د مالیې او عدلیې وزارتونو مسوولینو سره د پوهنتونونو مالي خپلواکۍ طرحې څېړنې او د پوهنتونونو رییسانو او مرستیالانو د معاشونو اجرا په موخه غونډه وکړه.
دغه ناسته کې چې د ولسمشرۍ ماڼۍ د چارو ادارې د دولت د چارو انسجام مرستیال ډاکټر عبدالکریم توتاخېل، د لوړو زده کړو وزارت علمي مرستیال پوهنمل عبدالتواب بالاکرزي، د لوړو زده کړو وزارت مالي او اداري معین نور احمد دروېش، د مالیې او عدلیې وزارتونو استازو او د کابل پوهنتون رییس ګډون لاره؛ د پوهنتونونو د مالي خپلواکۍ طرحې بررسۍ او د پوهنتونونو د رییسانو او مرستیالانو په تنخواوو کې د غلط فهمیو پر هوارولو بحث او خبرې وشوې.
د لوړو زده کړو وزارت مرستیالانو او د کابل پوهنتون رییس په یادو مسایلو د بحث تر څنګ د پوهنتونونو مالي خپلواکۍ بهیر پر ګړندي کولو ټینګار وکړ او د علمي او څېړنیزو خدماتو په اړه یې خپل وړاندیزونه د چارو ادارې له مشرتابه سره شریک کړل.
د چارو ادارې مشرتابه هم د پوهنتونونو عایداتي کولو او مالي خپلواکۍ په اړه د ولسمشر لارښوونې عملي کولو تر څنګ د مالي خپلواکۍ ظرفیت لرونکو پوهنتونونو ستونزو پر سمدستي حل ټينګار وکړ.
د ناستې په پای کې پرېکړه وشوه چې د پوهنتونونو مالي خپلواکۍ بهیر ګړندي کولو لپاره دې نور عملي ګامونه پورته او د معاشونو غلط فهمۍ حل لپاره دې هم بېړني اقدامات وشي.
