د لوړو زده کړو وزارت د مرکزي ادارو تشکیلاتي جوړښت د بیاکتنې کمېټې نوبتي غونډه جوړه شوه
د لوړو زده کړو وزارت د مرکزي ادارو د تشکیلاتي جوړښت د بیاکتنې نوبتي غونډه کې چې نن د دغه وزارت د مالي او اداري معین په مشرۍ جوړه شوه، د څېړنو معینیت رامنځته کولو پر څرنګوالي بحث وشو.
د غونډې په پیل کې د لوړو زده کړو وزارت مالي او اداري معین نور احمد دروېش د دغه وزارت د تشکیلاتي جوړښت پروسې په هکله وینا وکړه او د دغه وزارت د مرکزي ادارو د تشکیلاتي جوړښت د بیاکتنې پروسې پر چټکتیا د ټینګار تر څنګ یې د څېړنو او نوښت معینیت رامنځته کولو او اړتیا په اړه یې هراړخیزې څرګندونې وکړې.
نوموړي وویل چې د لوړو زده کړو وزارت د مشرتابه مقام د هدایت پر بنسټ د سیمې هېوادونو د تجریو مطالعې ته اړتیا ده چې پر بنسټ یې د معینیت رامنځته کولو لپاره جامع طرحه چمتو شي.
هغه ټینګار وکړ چې د بېلابېلو هېوادونو د تجربو تر کره مطالعې وروسته به د دغه معینیت پر تشکیلاتي جوړښت بحث وشي.
ورپسې د کمېټې غړو د یاد معینیت د رامنځته کولو او جوړښت د څرنګوالي په اړه خپل نظرونه څرګند کړل چې تر بحث او نظر شریکولو وروسته پرېکړه وشوه چې یوه تخنیکي کمېټه رامنځته شي او د سیمې او نړۍ هېوادونو له تجربو څخه په ګټې خپلې طرحې د کمېټې په راتلونکې غونډه کې وړاندې کړي.
همدارنګه په دې غونډه کې د تشکیلاتي جوړښت د بیاکتنې د عمل پلان چې د بشري منابع ریاست له لوري چمتو شوی، هم د کمېټې غړو ته وړاندې او تایید شو.
د مسوولانو په وینا ټاکل شوې چې د لوړو زده کړو وزارت د مرکزي ادارو د تشکیلاتي جوړښت د بیاکتنې پروسې د چټکتیا لپاره د یادې کمېټې نوبتي غونډې په اوونۍ کې یو ځل جوړه شي او د دې پروسې تر بشپړېدو وروسته د اکاډميکو معیارونو او اصولو په پام کې نیولو سره پر کادري بستونو کار وشي.
