د لوړو زده کړو وزارت د مرکزي ادارو د تشکیلاتي جوړښت د بیاکتنې کمېټې نوبتي غونډه جوړه شوه
د لوړو زده کړو وزارت د جوړښت کمېټې ناسته، د دغه وزارت مالي او اداري معین نور احمد دروېش په مشرۍ تر سره شوه.
په دغه ناسته کې د جوړښت اصلاح، د ایجاد د اړتیا تشخیص، د لوړو زده کړو وزارت اداري او اکاډمیکو غوښتنو سره سم د اداري او اکاډمیکو بستونو ادغام او حذف، د بېلابېلو ادارو د کاري کرښو پېژندل او د خدماتو په وړاندې کولو کې د کاري تداخل له منځه وړل او په ګټوره توګه د سرچینو لګښت په اړه بحث وشو او له یوبل سره یې نظرونه شریک کړل.
د لوړو زده کړو وزارت مالي او اداري معین نور احمد دروېش د جوړښت بیا کتنه او اصلاح یوه جدي اړتیا وبلله او ویې ویل چې د شرایطو له غوښتنو، اداري اړتیا او د افغانستان اسلامي جمهوریت له تمې سره سم د لوړو زده کړو وزارت پرله پسې هڅې کوي چې په مسوولانه توګه د خپل جوړښت بیا کتنه، اصلاح او د کار وړ یې کړي.
په دغه ناسته کې د اتو ریاستونو د جوړښت په اړه بحث وشو او د ناستې غړو په دې برخه کې خپلې طرحې، وړاندیزونه او اصلاحي نظرونه وړاندې کړل، چې پر بنسټ یې ځینې بستونه ایجاد، ځينې رامنځته، ځينې له منځه ولاړل او ځينې نور هم ادغام او یا حذف شول.
په پای کې مالي او اداري معین نور احمد دروېش د کمېټې څلور غړو ته دنده وسپارله چې د لوړو زده کړو وزارت اکاډمیکو چارو د ارزونې او څارنې ریاست د جوړښت په اړه په ځانګړي ډول کار وکړي او هغه موارد چې له تضمین کیفیت ریاست سره یې د تداخل امکان وي، وپېژني او د دوشنبې په ورځ یې په راتلونکې ناسته کې د کمېټې له غړو سره شریک کړي.
