د لوړو زده کړو وزارت محصلانو چارو معین ننګرهار ولایت ته د خپل کاري سفر پردوام د ننګرهار پوهنتون استادانو سره ناسته وکړه او د هغوی ستونزې او وړاندیزونه یې واورېدل.
د لوړو زده کړو وزارت د محصلانو چارو معین مفتي محمد طاهر احمد د اسلام له اړخه د استادانو مقام او ځانګړتیاوې بیان کړې او له هغوی یې وغوښتل، چې د هېواد د ځوان نسل په روزنه کې صداقت او ژمنتیا څرګنده کړي.
نوموړي همداراز وویل، چې استادان ځوانانو ته لیدلوری ورکوي او پکار ده، چې د دین او هېواد ساتنې احساس ورکولو ترڅنګ د شته امکاناتو څخه د محصل په روزنه کې ډېره ګټه پورته کړي.
همدارنګه د ننګرهار پوهنتون د علمي چارو مرستیال پوهندوی احسان الله ناصح د خپلو خبرو پرمهال دغه پوهنتون ته د لوړو زده کړو وزارت د ارزوونکي پلاوي له ورتګ مننه وکړه، چې د پوهنتون د لاپرمختګ په موخه یې ارزونه کوي او ستونزې او نیمګړتیاوې په ګوته کوي.
د ناستې په پای کې د ننګرهار پوهنتون د استادانو په استازولۍ یو تن استاد خپلې ستونزې او وړاندیزونه د محصلانو چارو معین سره شریک کړل، چې د نوموړي له لورې امکاناتو ته په کتو د ستونزو د حل او د وړاندیزو د منلو ډاډ ورکړل شو.
:نېټه پنجشنبه
۳/۱۲/۱۴۴۴ هـ ق ۲/۴/۱۴۰۲ هـ ش ۲۲/۶/۲۰۲۳ م
