د لوړو زده کړو وزارت مشرتابه پلاوي، د مرکزي ادارو او امارتي تحصیلي بنسټونو رئیسانو د ریاست الوزرا له سیاسي مرستیال مولوي عبدالکبیر سره د هغه په کاري دفتر کې وکتل.
په یاده لیدنه کې د ریاست الوزرا سیاسي مرستیال مولوي عبدالکبیر په سیاسي او اقتصادي برخو کې د ا.ا.ا لاسته راوړنو ته اشاره وکړه او ویې ویل: «اوسمهال افغانستان ازاد او خپلواک دی، یو سوچه اسلامي نظام پکې حاکم دی او موږ په بېلابېلو برخو کې ډېر پرمختګونه لرو.»
دغه راز نوموړي په تحصیلي بنسټونو کې د اصلاحي مجلسونو په دایرولو ټينګار وکړ او ویې ویل چې موږ مکلف یو چې محصلین د افغانستان په واقعي تاریخ پوه کړو او د منفي تبلیغاتو پر وړاندې یې اذهان روښانه کړو.
همدارنګه د لوړو زده کړو سرپرست وزیر شیخ الحدیث مولوي نداء محمد ندیم وویل چې د تحصیلي بنسټونو په رهبرۍ کې مو تکړه او متعهد کسان ګمارلي او باوري یو چې تحصیلي نظام به د پرمختګ پر لوري بوځي. نوموړي د ا.ا.ا له مشرتابه څخه مننه وکړه چې لوړو زده کړو وزارت ته یې ځانګړې پاملرنه کړې، ډېره بودیجه یې ورکړې او د دې برخې د پرمختګ لپاره یې لازمې لارښوونې او سپارښتنې ورته کړي دي.
همدا راز د لوړو زده کړو وزارت علمي معین دوکتور لطف الله خیرخواه د دغه وزارت د شته محصلینو، استادانو، کارکوونکو او عمده لاسته راوړنو په اړه معلومات وړاندې کړل.
د یادونې وړ ده چې په دغه لیدنه کې د تحصیلي بنسټونو د رئیسانو استازي هم خپلې خبرې وکړې او د رئیس الوزرا سیاسي مرسیتال سپارښتنې او لارښوونې یې په غور سره واورېدې.
