د لوړو زده کړو وزیر په پکتیا پوهنتون کې یوې سترې غونډې ته د وینا تر څنګ، په دغه پوهنتون کې د ۵۳ میلیونه افغانیو په ارزښت دوې پروژې پرانیستې

د لوړو زده کړو وزیر محترم شیخ الحدیث مولوي نداء محمد ندیم پکتیا ولایت ته د خپل رسمي سفر په ترڅ کې د استادانو او محصلینو یوې سترې غونډې ته، چې د اطلاعاتو او کلتور وزارت د ګرځندوی معین، د پکتیا علماوو شورا مرستیال، د جهادي مدرسې رئیس، د ولایتي ادارو یو شمېر رئیسانو، د پکتیا پوهنتون رهبري پلاوي، استادانو او محصلینو ګډون کړی و، وینا وکړه. 

محترم شیخ صاحب په یاده غونډه کې په دونیوي ژوند کې د دیني او عصري علومو پر اړتیا خبرې وکړې او محصلینو ته یې سپارښتنه وکړه چې د خپلو زده کړو موخه د الله تعالی رضا او د اسلامي ټولنې خدمت وګرځوي. 

دغه راز د لوړو زده کړو وزیر یاد پوهنتون ته په ۱۴۰۴هـ.ش کال کې نویو شاملو شویو محصلینو ته هم لازمې لارښوونې وکړې ورته ویې ویل: «په پوهنتون کې ستاسو د تخصصي، فکري، عقیدوي او اخلاقي روزنې لپاره امکانات برابر شوي، نو له دې فرصت څخه سمه ګټه واخلئ.» او زیاته یې کړه چې تاسو هغه وخت د اسلامي ټولنې او اسلامي نظام غوښتنې پوره کولی شئ، چې منظم مهالوېش ولرئ، خپل وخت ضایع نه کړئ او زحمت وباسئ. 

همدارنګه په یاده غونډه کې د اطلاعاتو او کلتور وزارت د ګرځندوی معین مولوي قدرت الله جمال په خپلو خبرو کې له محصلینو وغوښتل چې د خپلو زده کړو نیت د ټولنې خدمت وګرځوي او په پوره اخلاص ورته کار وکړي. 

وروسته د لوړو زده کړو وزیر د پکتیا پوهنتون مسؤلینو په ملتیا د پکتیا پوهنتون تدریسي روغتون لپاره د ۳۳ میلیونه افغانیو په ارزښت د طبي تجهیزاتو پېرلو او د ۲۰ میلیونه افغانیو په ارزښت د یوه محراب مسجد د جوړولو، چې په یوه وخت کې به د ۱۵۰۰ تنو لمونځ کوونکو ظرفیت ولري، پروژې پرانیستې. 

د یادونې وړ ده چې د لوړو زده کړو وزیر تېره ورځ په لوګر پوهنتون کې هم یوې سترې غونډې ته د وینا تر څنګ، د ۵۱ میلیونه افغانيو په ارزښت د داخلي سړکونو جوړولو پروژه پرانیستې وه.

نېټه: شنبه

۱۴۴۷هـ.ق، د صفرالمظفر ۲۹مه

۱۴۰۴هـ.ش، د زمري لومړۍ

۲۰۲۵م، د اګېسټ ۲۳مه