د لوړ زده کړو سرپرست وزیر د ویډیوکنفرانس له لارې د دولتي پوهنتونونو رئیسانو او فوق العاده استازو ته د علماؤ کرامو د دیني اسنادو د ارزیابۍ په پروسه کې د شفافیت او ورته نورو مسایلو توصیه ورکړه.
۱۰/۱۰/۱۴۴۳
د لوړ زده کړو سرپرست وزیر د ویډیوکنفرانس له لارې د دولتي پوهنتونونو رئیسانو او فوق العاده استازو ته د علماؤ کرامو د دیني اسنادو د ارزیابۍ په پروسه کې د شفافیت او ورته نورو مسایلو توصیه ورکړه.
یاد ویډیو کنفرانس چې د لوړو زده کړو سرپرست وزیر الحاج مولوي عبدالباقي حقاني په مشرۍ دایر شوی و، د دیني جامعاتو او تخصصاتو رئیس، د دولتي پوهنتونونو رئیسانو او فوق العاده استازو ګډون درلود.
په دې ویډیو کنفرانس کې د لوړو زده کړو سرپرست وزیر الحاج مولوي عبدالباقي حقاني یادو مسؤلینو ته په لنډ وخت کې د دیني علماؤ د اسنادو د ارزیابۍ پروسې پیلېدو خبر ورکولو ترڅنګ وویل: " دا پروسه باید په ډېره شفافه او بې طرفه توګه پرمخ یوړل شي، د علماؤ کرامو خیال وساتل او مشکلات یې حل شي، ترڅو د دوی د رضایت سبب وګرځي."
دغه راز ښاغلي حقاني ګډونوالو ته توصیه وکړه، چې د تېرو ۲۵ کلونو اسنادو راجمع کول او ارزیابي کول، وخت او حوصلې ته اړتیا لري؛ نو باید په صادقانه ډول دغه کار ترسره شي.
بل لور ته د دولتي پوهنتونونو یو شمیر استازو خپلې ستونزې شریکې کړې، چې د سرپرست وزیر له لوري د حل کېدو ډاډ ورکړل شو او په ځینو مسایلو کې یې ورته لازمې سپارښتنې وکړې.
