د مرکز او ولایتونو د پوهنتونونو له مسوولانو سره د لوړو زده کړو وزارت د علمي معین ویډیویي کنفرانس
د لوړو زده کړو وزارت علمي معین د هېواد په تحصیلي بنسټونو کې د نړیوالو علمي ژورنالونو رامنځته کولو پروسې چټکتیا په موخه مسوولانو ته هدایت ورکړ چې په دې برخه کې خپلې چارې ګړندۍ کړي.
په هغه ناسته کې چې نن په همدې موخه د ویډیو کنفرانس له لارې د مرکز او ولایتونو پوهنتونونو سره جوړه شوه، د لوړو زده کړو وزارت علمي معین پوهنمل عبدالتواب بالاکرزي د هېواد په تحصیلي بنسټونو کې د نړیوالو ژورنالونو د اهمیت په اړه معلومات وړاندې کړل او د دغو بنسټونو له مسولانو یې وغوښتل چې د ژورنالونو رامنځته کولو په برخه کې خپلې چارې ګړندۍ کړي.
هغه وویل چې په تحصیلي بنسټونو کې د علمي ژورنالونو رامنځته کول د هغو استادانو د مقالو خپرولو لپاره اړین دي چې بهرنیو نړیوالو ژورنالونه ته کم لاسرسی لري، ځکه چې په دې ډول د بهرنیو جعلي او بې اعتباره ژورنالونو لخوا د دوی د غولولو مخنیوی کېږي.
همدارنګه د لوړو زده کړو وزارت علمي معین یادو مسولانو ته ډاډ وکړ چې لوړو زده کړو وزارت په دې اړوند د دوی د ستونزو د هواري لپاره همکار دی او له پروګرامونو یې ملاتړ کوي.
