د هوا د ککړوالي او چاپیریال په تړاو د پوهاوي د کميټې ناسته تر سره شوه

د لوړو زده کړو سرپرست وزیر پوهنمل عبدالتواب بالاکرزي په مشرۍ د چاپيريال ساتنې په تړاو د عامه پوهاوي ورکولو په موخه ناسته تر سره شوه.

په دې ناسته کې د لوړو زده کړو وزارت علمي مرستيال او سرپرست پوهنمل عبدالتواب بالاکرزي، د لوړو زده وزارت مالي او اداري مرستیال دوکتور احمد سیر مهجور، د مرکزي ادارو یو شمير رئیسانو، د مقام سلاکارانو، د مرکز د دولتي پوهنتونو د پوهنځيو رئیسانو او استادانو ګډون کړی و.

د لوړو زده کړو وزارت سرپرست پوهنمل عبدالتواب بالاکرزي، د هوا ککړوالی د اوسیدونکو د روغتیا او سلامتۍ لپاره یو ګواښ وبلل او له ټولو استادانو او متخصصينو څخه یې وغوښتل چې د علمي او تخنیکي طرحو په وړاندې کولو د ککړې هوا سره مبارزه کې د ټولنې د علم او پوهې د متوليانو په عنوان خپل رول ولوبوي.
نوموړي د علمي ټولنې رول د هوا او چاپيريال د راتلونکو سرچینو په معلومولو او پیژندلو کې مهم وبلل او ویې ویل: "پر موږ لازمه ده چې د هوا او چاپيريال د ککړوالي سره په مبارزه کې د مرکز نه نیولې د ولایاتو تر پوهنتونو پورې د علمي حل لارو په را پیدا کولو کې خپل رول سر ته ورسوو."

د لوړو زده کړو وزیر په اوږد مهاله توګه د هوا او چاپیریال د ککړوالي د موثر کنټرول له لارو څخه یو هم د چاپیریال او هوا پیژندنې علومو او اړوندو څانګو کې د نویو کادرونو روزل یاد کړل او ویې ویل: "د ICCR د ۱۰۰۰ بورسونو چې پرې کار جریان لري، د داوطلبانو څخه ۱۰۰ تنه به د هندوستان له سفارت سره په همغږۍد چاپيريال او هوا پیژندنې او هغو څانګو کې چې د هوا د ککړوالي په را کمولو کې موثر وي وړاندیز وکړو او همدارنګه د مخکیني نصاب په بیا کتنه کې چې په دې برخه کې به یو پوهنتون شموله مضمون په نظر کې ونیسو او هڅه کوو تر څو د ککړې هوا او نامناست چاپيريال سره د مبارزې مسئله په ملي نصاب کې پیاوړې شي."

وروسته د لوړو زده کړو وزارت مالي او اداري مرستیال دوکتور احمد سیر مهجور د چاپیریال او هوا د ککړوالي مسئلې ته توجه کول لازمي وبلل ویې ویل چې لوړو زده کړو وزارت د وزارت او پوهنتونو په چاپیریال کې د نيالګيو په کينولو، د باغچو به بیا رغولو سره خپل رول لوبولی دی، خو لازمه ده چې د هوا د ککړوالي جدې خطر په نظر کې نیولو سره دغه مسئله لا جدې ونیول شي.

دوکتور مهجور وړاندیز وکړ چې د اکاډمیکو چاپیریالونو د زرغون ساتلو په څنګ کې د هوا او چاپيريال د ککړوالي موضوع د استادانو په علمي څیړنو او د محصلینو په منوګرافونو کې د ټولنې د پوهاوي لپاره باید په نظر کې ونیول شي.

به دغه ناسته کې د چاپیریال د چارو ماهرينو او متخصصينو د هوا او چاپيریال د ککړوالي په لاملونو، د هوا د ککړوالي څخه د مخنیوي او د هغې د تصفیې د لارو په اړه مفصلې خبرې وکړې او پریکړه وشوه چې د کمیټې غړي په لیکلې بڼه، د هوا او چاپيريال د ککړوالي د سرچینو او لاملونو د معلومولو په هکله خپلې نظریې او علمي حل لارې د شنبې تر ورځې ولیکي او د چاپيريال او هوا د ککړوالي په اړه د خبر ورکولو کمیټې وروستۍ ناستې ته وسپاري.

د ټولنيزو رسنیو، د پوهنتونو د علمي مجلو او ویب سایټونو له لارې څخه د څيړنيزو او پوهاوي ورکونکو مقالو لیکل او خپرول، په اکاډیمیک او ټولنيز ډګر کې د علمي او ښاري بحثونو جوړول، له هغو مسئلو څخه و چې د هوا د ککړوالي د راکمولو په هکله په دې ناسته کې ورباندې ټینګار وشو.