د هېواد د پوهنتونونو د کمپیوټر ساینس پوهنځي د تحصیلي نصاب د بیاکتنې او پراختیا کلستر نن د لوړو زده کړو سرپرست وزیر په شتون کې پيل شو
یکشنبه، ۲۲ کب ۱۴۰۰
د هېواد د پوهنتونونو د کمپیوټر ساینس پوهنځي د تحصیلي نصاب د بیاکتنې او پراختیا کلستر نن د لوړو زده کړو سرپرست وزیر په شتون کې پيل شو
په همدې موخه جوړو شوو مراسو کې د لوړو زده کړو سرپرست وزیر مولوي عبدالباقي حقاني وویل،
د هېواد اوسنیو حالاتو ته په کتلو سره دا هېواد ډېر کار ته اړتیا لري او د هېواد ابادي په تعلیم او تحصیل سره کېږي، موږ غوره ګڼو چې د هېواد پر ځان بسیاء کېدو لپاره لومړی پر تحصیلي بنسټونو کار وکړو او داسې ځوانان وروزو چې د هېواد په ابادۍ کې رغنده رول ولوبوي؛ نو په همدې موخه د تېرو څو اونیو راهیسې موږ د هېواد پوهنتونونو د پوهنځيو نصاب پر بیا کتنه کار کوو، ترڅو داسې یو قوي نصاب او د تدریس غوره طریقه برابره کړو چې ګټور تمام شي.
نوموړي د هېواد ابادي په تحصیل پورې تړلې یاده کړه او په دې برخه کې یې د استادانو فعالیتونه مهم وبلل.
همدا شان سرپرست وزیر پر دې تاکید وکړ چې باید په پوهنتونو کې د نظري درسونو پر ځای پر عملي زده کړې ډېر تمرکز وشي، ځکه په عملي زده کړه کې محصلین ډېر کار ته هڅېږي او راتلونکي کې داسې زده کړیالان د هېواد لپاره موثر تمامیدای شي.
ورپسي د لوړو زده کړو وزارت علمي معین دوکتور لطف الله خیرخوا وینا وکړه او ویې ویل، افغانان خپل هویت لري او باید خپل کارونه په خپله وکړي، نوموړي د کلستر پر ګډونوالو غږ وکړ، چې د کمپیوټر ساینس برخه کې داسې یو تحصیلي نصاب جوړ کړي، چې د اوسنیو او راتلونکو نسلونو لپاره ګټور تمام شي.
دغه راز نوموړي وویل، موږ اوس پر داسې یو تحصیلي نصاب کار کوو، چې د محصل لپاره په زړه پورې وي، اوسنیو شرایطو سره برابر وي او په راتلونکې کې هېواد ته داسې کادرونه وړاندې کړي چې د هېواد د پرمختګ سبب وګرځي.
د یادولو وړ ده چې تر دې وړاندې هم د هېواد پوهنتونو د بېلابېلو پوهنځيو لپاره د تحصیلي نصابونو د بیا کتنې کلسترونه جوړ شوي چې پر ځینو نصابونو کار هم شوی دی.
