د کابل پوهنتون علمي کادر په بستونو کې د ګډون لپاره ازموینه واخیستل شوه
۱۷/۹/۱۴۴۳
۳۰/۱/۱۴۰۱
د کابل پوهنتون علمي کادر په بستونو کې د ګډون لپاره ازموینه واخیستل شوه.
د لوړو زده کړو وزارت علمي معین دوکتور لطف الله خیرخواه د یادې ازموینې له جریان څخه څارنه وکړه او ګډونوالو ته یې د بریا د غوښتنې تر څنګ، د ازموینې د پروسې د روڼتیا په اړه پوره ډاډ ورکړ.
په دغه ازموینه کې نیږدې 600 کسانو د کابل پوهنتون مختلفو علمي کادرونو په بستونو کې د شاملېدو لپاره ګډون کړی و.
د لوړو زده کړو وزارت علمي معین د یوه ډیجیټالي ډيټابیس پر جوړولو ټينګار وکړ او وویل، چې ډیټابیس به د پوهنتونونو د علمي کادر د بستونو په ازموینه کې مرسته وکړي.
نوموړې ازموینه له نړیوالو ژبو سره د ګډونوالو د بلدتیا په موخه واخیستل شوه او په پام کې ده، چې په نیږدې راتلونکي کې تخصصي ازموینه هم واخیستل شي.
همدارنګه د لوړو زده کړو وزارت علمي معین د کابل پوهنتون له کتابتون څخه د لیدنې پر مهال د کتابونو پر منظمولو ټيڼګار وکړ او ویې ویل، چې د کتابونو هره برخه باید بېله بېله وي، تر څو محصلین په اسانه توګه لاسرسی ورته ومومي.
