زموږ په ټولنه کې تر اوسه پورې پر اخلاقو، فکر او تعلیم باندې د هنر د مختلفو برخو د اغیزو په اړه کافي معلومات نه دي ورکړل شوي.
دغه څرګندونې د لوړو زده کړو وزارت علمي معین دوکتور لطف الله خیرخواه د هېواد د ښکلو هنرونو پوهنځي اړوندو څانګو د تحصیلي نصاب د بیا کتنې او پراختیا لومړي پړاو کلسټر د پرانیستې په مراسمو کې وکړې.
هغه همداراز وویل: « زموږ په ټولنه کې تر اوسه پورې د هنر او فن تربیتي او اخلاقي رول په اړه هومره معلومات ندي ورکړل شوي، څومره چې پکار دي».
نوموړي زیاته کړه، دا زموږ مسؤلیت دی، چې د خپلو دیني او ملي ارزښتونو له مخې د هنر او فن په اړه بحث او د ټولنې پر ذهنونو یې د تعلیمي او روزنیزو اغیزو په اړه خبرې وکړو.
ورپسې د لوړو زده کړو وزارت د تحصیلي نصاب رئیس مفتي عبدالرؤف فراهي د یاد کلسټر په دایریدو خوښي څرګنده کړه او ویې ویل، چې د هنرونو پوهنځي د نصاب د بیا کتنې او پراختیا لومړي پړاو کلسټر کې د هنرونو پوهنځي ۱۳ څانګې شاملې دي، چې د پنځو ورځو په موده کې به په پروګرام کې شاملو استادانو له لوري پرې کار وشي.
نوموړي د هنر او فن په اړه هم خبرې وکړې او ويې ويل، چې د اسلام مبارک دين د ټولنې د اړتياوو له مخې هرې برخې لپاره جلا اصول او لارښوونې ټاکلې دي، چې هنر او فن هم له دې مستثنی نه دي.
د تحصیلي نصاب ملي کمیسیون غړي پوهندوی داود شاه فاروق د فرعي کلسټرونو د ویش، د ګډون کوونکو غړو د معرفي کولو، د فرعي کلسټرونو د رئیس، مرستیالانو او منشيانو د ټاکلو او د کلسټر غړو ترمنځ د ارتباطي ګروپ جوړولو په اړه هر اړخیز معلومات وړاندې کړل.
د یادولو وړ ده، چې په افغانستان کې د اسلامي امارت د واکمنۍ له پیل راهیسې د لوړو زده کړو وزارت د اړوندو ادراو په همکارۍ په ګڼو تحصیلي څانګو کې د بیا کتنې او پراختیا په برخه کې کار کړی او دا پروسه لا هم دوام لري.
