په کابل پوهنتون کې د علامه سید جمال الدین افغان د مقبرې پر بیا جوړولو او نوي کولو کار پیل شو
هغه غونډه چې په همدې مناسبت په کابل پوهنتون کې جوړه شوې وه، د جمهوري ریاست دویم مرستیال قانونپوه سرور دانش، د لوړو زده کړو سرپرست وزیر پوهنمل عبد التواب بالاکرزي، د ښار جوړولو او ځمکو سرپرست وزیر محمد جواد پیکار، د اطلاعاتو او فرهنګ سرپرست وزیره حسینه صافۍ، په تحصیلي چارو کې د جمهوري ریاست سلاکار او د کابل پوهنتون رئیس پوهنمل حمیدالله فاروقي او د مشرانو جرګې دویم نائب آصف صدیقي حضور درلود.
د جمهوري ریاست دویم مرستیال قانونپوه سرور دانش په یاده غونډه کې د سید جمال الدین افغان د شخصیت او آثارو د مختلفو اړخونو په اړوند معلومات وړاندې کړل او ویې ویل: «افغانستان یو تاریخي هیواد دی او د غښتلیو اشخاصو او نومیالیو پوهانو د روزنې زانګو وه چې یو هم له دغو نومیالیو څخه د ختیځ نابغه علامه سید جمال الدین افغان دی. نوموړی په خپل وخت کې د اسلامي نړۍ د راویښوونکو له جملې څخه و چې په ختیځ او لویدیځ کې یې نړیوال نوم درلود».
د جمهوري ریاست دویم مرستیال وویل، په وروستیو کلونو کې د افغانستان دولت او خلکو د علامه سید جمال الدین افغان د افکارو او آثارو په اړوند خپله پاملرنه کمه کړې ده، نوموړي له کابل پوهنتون او نورو علمي او څیړنیزو بنسټونو وغوښتل تر څو د سید جمال الدین افغان د افکارو او آثارو د زیاتې او ښې پیژندنې په ډګر کې علمي او څيړنیز کنفرانسونه دایر کړي.
استاد سرور دانش همدا ډول وویل: «هیله مند یم لکه د نن په څېر چې د ارواښاد سید جمال الدین افغان مقبره نوې کوو او بیا یې جوړوو؛ وکولای شو چې یوه ورځ د ده لوړ افکار هم را ژوندي کړو او د هغه د افکارو له روښنایې څخه د نني ژوند او د خپلو ستونزو لپاره د حل لارې په موندلو کې ګټه پورته کړو.»
د چارواکو په خبره، د علامه سید جمال الدین افغان د مقبرې بیا جوړونه د ۲۱ میلیونه او ۵۰۰ زره افغانیو په لګښت د ښار جوړونې او ځمکو وزارت له بودیجې څخه تادیه کیږي چې د احاطې دیوال، لنډسکیپ، د ګلدانونو ترمیمول، د اوبو حوض او د مقبرې ترمیمول په کې شامل دي او د ۱۳۹۹ کال تر اخیره به تکمیل شي.
د یادولو وړ ده چې علامه سید جمال الدین افغان د ۱۲۱۷ کال د لړم په ۲۵ د کنړ ولایت په اسعد آباد ښار کې دنیا ته سترګې پرانیستلې دي او د ۱۲۷۵ د کب په ۱۹ یې د ۵۹ کالو په عمر د ورپیښې ناروغۍ له امله په ترکیې هیواد کې وفات شوی او هلته خاورو ته سپارل شوی و چې ۷۶ کاله وروسته دده جسد افغانستان ته راوړل شو او د کابل پوهنتون په محوطه کې دفن شو.
د لوړو زده کړو سرپرست وزیر پوهنمل عبدالتواب بالاکرزی د افغانستان اسلامي جمهوريت جلالتمآب جمهور رئيس، د ښار جوړونې او ځمکو محترم وزارت او ټولو هغو اړخونو څخه چې د علامه سید جمال الدین افغان د مقبرې په بیا جوړونې کې يې کوښښ او هڅې کړي د زړه له تله مننه کوي.
