په کندهار پوهنتون کې د لوړو زده کړو سرپرست وزیر په ملاتړ غونډه ترسره شوه.
په دې غونډه کې د کندهار پوهنتون رئېس پوهنوال محمد زکريا اميرزاده، د کندهار پوهنتون د مالي او اداري چارو مرستيال انجنیر محمد ناصر نېکزاد، د کندهار پوهنتون د پوهنځيو رئېسانو، استادانو، اداري کارکوونکو، د خصوصي پوهنتونونو استازو، ټولنيزو فعالانو، ملي او قومي مشرانو ګډون کړی وو.
د غونډې په پېل کې د کندهار پوهنتون رئېس پوهنوال محمد زکريا اميرزاده ګډونوالو ته ښه راغلاست ووايه او د لوړو زده کړو په سرپرست وزیر الحاج مولوي عبدالباقي حقاني یې د ملګرو ملتونو له لوري بندیز ته په اشارې سره وویل،" د تاریخ په اوږدو کې تل له مسلمانانو سره داسې چلند شوی او له دې کړنو یې موخه د مسلمانانو کمزوري او د دوی د پرمختګ مخنیوی کول دي؛ چې مسلمانانو تل د دوی د دوی پر وړاندې مبارزه کړې ده."
دغه راز پوهنوال امیرزاده له نړيوالې ټولنې وغوښتل، چې د افغاني ټولنې د پرمختګ مخنیوی دې نه کوي او د لوړو زده کړو له سرپرست وزیر دې لګول شوی بندیز لیرې کړي.
همدارنګه په یاده غونډه کې د بېلابېلو تحصیلي بنسټونو رئیسانو، د کندهار پوهنتون استادانو او فعالانو ویناوې وکړې او د لوړو زده کړو په سرپرست وزیر د ملګرو ملتونو د بندیز لیرې کولو غوښتنه یې وکړه.
یاده دې وي، چې تر دې وړاندې هم د هېواد په بېلابېلو تحصیلي بنسټونو کې د لوړو زده کړو سرپرست وزیر الحاج مولوي عبدالباقي پر ملاتړ ناستې او غونډې ترسره شوې دي.
