د لوړو زده کړو وزارت رهبري شورا ناسته ترسره شوه
یاده ناسته چې د دغه وزارت د سرپرست وزیر محترم شیخ الحدیث مولوي نداء محمد ندیم په مشرۍ ترسره شوه، په پیل کې د یاد وزارت مالي او اداري معین مولوي حافظ محمد حامد حسیب د وخت پر ارزښت او اهمیت خبرې وکړې.
نوموړي وویل چې په اداري چارو کې دا زموږ مسؤلیت دی چې دندې ته په خپل وخت حاضر او په رسمي وخت کې خپلې رسمي چارې په غور او ښه ډول ترسره کړو او له وخت څخه اعظمي ګټه واخلو.
هغه له شرعي پلوه د وخت پر ارزښت خبرې وکړې او ویې ویل چې وخت تر ټولو غوره نعمت دی، اړینه ده چې پوره قدر یې وکړو.
وروسته له اجنډا سره سم پر بېلا بېلو موضوعاتو لکه په پوهنتونونو کې له مخابراتي او نورو شرکتونو سره د هوکړه لیکونو د لاسلیکولو پر څرنګوالي، د لوړو زده کړو مؤسسو ارتقاء پوهنتونونو ته، د لوړو زده کړو وزارت اړوند دیني جامعاتو استادانو له پوهندوی رتبې څخه لوړې رتبې ته ارتقاء طرزالعمل، په راتلونکي کال کې د کرنې پوهنځیو د لابراتوارونو د تجهیز او مالي امکاناتو چمتو کولو او پر یو شمېر نورو مهمو موضوعاتو بحث او لازمې پرېکړې وشوې.
نېټه: سه شنبه
۱۴۴۶ هـ.ق د رجب المرجب ۲۷مه
۱۴۰۳ هـ.ش د سلواغې ۹مه
۲۰۲۵ م د جنوري ۲۸مه
