نېکمرغه کوچني اختر په مناسبت، د لوړو زده کړو سرپرست وزیر الحاج مولوي عبدالباقي حق اني او رهبري پلاوي د مبارکۍ پیغام!
د نېکمرغه کوچني اختر په مناسبت، د لوړو زده کړو سرپرست وزیر الحاج مولوي عبدالباقي حق اني او رهبري پلاوي د مبارکۍ پیغام!
بِسْمِ اللهِ الرَّحْمنِ الرَّحِیم
محترم امیرالمؤمنین شيخ هِبة الله اخندزاده (حفظه الله)، د ا.ا.ا رئیس الوزراء محترم ملا محمد حسن اخند، د ریاست الوزراء محترمو مرستیالانو، د کابینې محترمو غړو، علماء کرامو، ګرانو مجاهدینو، د اشغال د خاتمې او خپلواکۍ د لارې د شهیدانو قدرمنو کو رنیو، استاذانو، محصلینو، افغان مجاهد ولس او ټول اسلامي امت ته د زړه له کومي د کوچني اختر مبارکي وایو.
هيله لرو چې د درنو هېوادوالو او ټولو مسلمانانو روژې، طاعات، عبادات او صدقات به د رحمت، مغفرت او برکت په دې مبارکه میاشت کې د الله سبحانه وتعالی په دربار کې قبول شوي وي.
درنو هېوادوالو!
زموږ ګران هېواد افغانستان څه دپاسه څلور لسیزې د نړۍ د سترو قدرتونو له مستقیمو او غیر مستقیمو مداخلو او ستونزو سره لاس او ګریوان و، چې په پایله کې یې زموږ د خلکو ټول فزيکي، ديني، کلتوري او ټولنيز جوړښتونه زیانمن شوي دي.
د افغانستان غیور او با شهامته ولس د اشغال او تیري پر وړاندې چوپ پاتې نه شو، په ځانګړي ډول په تېرو دوو لسیزو کې د خپلواکۍ د لارې ډېر مشالونه وځلېدل، له خپلو ديني او کلتوري ارزښتونو څخه د دفاغ او ملي هويت ساتلو لپاره یې خپل خواږه وجودونه قرباني کړل.
اوس الحمدالله د ا.ا.ا له فتحې وروسته، افغانستان خپله خپلواکي بېرته ترلاسه کړې، اشغالګر یې په ټيټو سترګو له دې خاورې شړلي او په افغانستان کې یو خپلواک او اسلامي نظام حاکم دی.
موږ باور لرو چې په هېواد کې د لوړو زده کړو په ودې او ځوانانو ته د علم په برخه کې د لا زیاتو فرصتونو په برابرولو سره، ډېر ژر د اسلام د لارې مجاهدینو او شهیدانو ارمانونو او موخو ته رسېدلی شو.
د افغانستان تحصیلي سکټور، په هېواد کې د یوه پرمختللي، په دیني او ملي ارزښتونو سمبال تحصیلي نظام حاکمولو او همدارنګه افغاني ټولنې ته د متدینو او بااستعداده ځوان علمي کادرنو د وړاندې کولو لپاره شپه او ورځ هڅه کوي.
په پای کې یو ځل بیا افغان باشهامته ولس او د نړۍ ټولو مسلمانانو ته د زړه له کومي د کوچني اختر مبارکي وایو او د ازادۍ د لارې شهیدانو پاکو روحونو ته د مغفرت دعا کوو.
د یوه اباد، پرمختللي، متعهد او اسلامي افغانستان په هیله!
په درنښت
د لوړو زده کړو سرپرست وزیر
الحاج مولوي عبدالباقي حق اني
