د لوړو زدهکړو سرپرست وزیر شیخ الحدیث مولوي نداء محمد ندیم صاحب له غزني پوهنتون او زابل لوړو زدهکړو مؤسسې څخه لیدنه وکړه
د لوړو زده کړو سرپرست وزیر د خپل کاري سفر په ترڅ کې د غزني پوهنتون او د غزني تخنیکي پوهنتون څخه د لیدنې ترڅنګ یې د یادو پوهنتونونو له مسؤلینو او استادانو سره ناسته وکړه او د هغوی ستونزې او وړاندیزونه یې واورېدل.
د لوړو زده کړو سرپرست وزیر په غزني پوهنتون کې جوړې شوې غونډې ته د وینا پر مهال وویل، افغانستان جګړو او ناخوالو ویجاړ کړی دی، د ودانولو لپاره یې باید ټول په ګډه یو بل ته لاس ورکړو او تر خپلو مسئولیتونو ډېره هڅه وکړو.
همداراز یې استادانو ته وویل، چې د هېواد ځوان نسل راتلونکي رهبران دي نو تاسو یې په اسلامي ثقافت وروزئ.
د یاد سفر پر دوام سرپرست وزیر د زابل ولایت د ميرويس خان نيکه لوړو زدهکړو مؤسسې څخه هم لیدنه وکړه او د درسي او اداري خونو په ګډون یې د مؤسسې ټولې برخې وکتلې.
د لوړو زدهکړو سرپرست وزیر په زابل ولایت کې جوړې شوې غونډې ته په داسې حال کې چې د زابل مرستیال والي هم شتون درلود وویل، چې د لوړو زدهکړو وزارت د بېلابېلو پوهنځیو د نصابونو بیاکتنه کړې او په پلان کې ده، چې د نصاب بیا کتنې ترڅنګ په پوهنتونونو کې څېړنېز مرکزونه هم جوړ شي. هغه زیاته کړه چې، موږ هر وخت ستاسو په چوپړ کې یو او موږ حاکمان نه بلکې د ولس خادمین یو.
١٤٤٤/٨/١٧
