د لوړو زده کړو وزارت رهبري شورا ناسته، د دغه وزارت سرپرست وزیر شیخ الحدیث مولوي نداء محمد ندیم صاحب په مشرۍ تر سره شوه.
د ناستې په پیل کې د لوړو زده کړو سرپرست وزیر ستونزې او نعمتونه د الله تعالی له لوري امتحان وبلل او د لوړو زدهکړو وزارت له ټولو مسؤلینو یې وغوښتل چې د کارونو تر څنګ، خپلو اعمالو او عباداتو ته متوجه شي.
نوموړي په راتلونکي نوي ١٤٤٥ هجري قمري کال کې هم د الله تعالی له دربار څخه د توفیق هیله وکړه، چې دا کال هم د مسلمانانو په خدمت کې تېر کړي.
همدارنګه د تېرې شورا پرېکړو ته لنډه کتنه وشوه او د شویو کړنو راپورونه وړاندې شول.
وروسته له اجنډا سره سم د خصوصي لوړو زده کړو بنسټونو د کانکور ازموینې لپاره د ټاکل شوې کمېټې لخوا د ترتیب شوې کړنلارې پر مسودې، د خصوصي لوړو زده کړو بنسټونو د علمي کادر د دایمې جذب په هکله د مؤظفې کمېټې لخوا د ترتیب شوې لایحې پر مسودې، د ځينو فوق لېسانس برنامو د تقنیني اسنادو او احکامو د تعدیل په اړه او همدارنګه د خصوصي تحصیلي بنسټونو پر ځينو نورو موضوعاتو بحثونه او لازمې پرېکړې وشوې.
