د لوړو زده کړو وزارت علمي معین د پروان پوهنتون د ۱۴۰۲هـ.ش کال محصلینو په فراغتغونډه کې ګډون او وینا وکړه.
د پروان پوهنتون د محصلینو په فراغتغونډه کې د پروان ولایتي ادارې مسؤلینو، د کابل پوهنتون رئیس، د پروان پوهنتون مشرتابه پلاوي، استادانو، محصلینو، د محصلینو کورنیو، قومي مشرانو او د رسنیو استازو ګډون کړی و.
په یاده غونډه کې د لوړو زده کړو وزارت علمي معین دوکتور لطف الله خیرخواه فارغو شویو محصلینو او د هغوی کورنیو ته د مبارکۍ تر څنګ فارغو شویو محصلینو ته په خطاب کې وویل: «ستاسو فراغت په دې مانا نه دی، چې له زده کړو فارغ شوئ، تاسو یوازې د زده کړو یو پړاو تکمیل کړ، تر دې وروسته به هم خپلو لوړو زده کړو ته دوام ورکوئ او په انفرادي ډول به خپلې مطالعې جاري ساتئ.»
نوموړي محصلینو ته وویل چې د پوهنتون تحصیلي دورې باید ستاسو په علم، اخلاقو، فکر، منطق او استدلال کې مثبت بدلون راوستلی وي او باید ټولنې ته د مسؤلیت پذیره اشخاصو په حیث وړاندې شئ.
دغه راز د لوړو زده کړو وزارت علمي معین وویل: «موږ تر هغه وخته خپل هویت، ثقافت او تاریخ نه شو ساتلی، تر څو چې علم ته د علم په سترګه ونه ګورو او ارزښت ورنکړو.» هغه د لوړو زده کړو وزارت د تېرو دوو کلونو لاسته راوړنو ته په اشارې سره وویل چې دغه وزارت د علم پراختیا او لوړو زده کړو د پرمختګ په برخه کې هېڅ ډول هڅې نه سپموي.
همدارنګه د پروان ولایت والي مولوي عبدالعلي قدرت الله امیني وویل چې د پرمختللو هېوادونو د پرمختګ لامل علم او ټکنالوژي ده او موږ هم باید ځانونه د نړۍ علمي کاروان ته ورورسوو.
وروسته د پروان پوهنتون رئیس دوکتور محمد عزیز کاظم د پروان پوهنتون په اړه معلومات ورکړل او له فارغو شویو محصلینو څخه یې وغوښتل چې په پوره اخلاص د خپل هېواد او خلکو لپاره خدمت وکړي.
د یادولو وړ ده چې د پروان پوهنتون ۹ پوهنځيو له ۲۷ څانګو څخه (۸۷۸) کسان فارغ او ټولنې ته د خدمت لپاره وړاندې شول. دغه راز د غونډې په پای کې فارغو شویو محصلینو ته مبارک پاڼې ووېشل شوې.
هېره دې نه وي چې د لوړو زده کړو وزارت علمي معین د پروان والي او یاد پوهنتون مشرتابه پلاوي په ملتیا د ۵،۵ میلیونه افغانیو په لګښت د پروان پوهنتون ختیځ، لوېدیځ او جنوب لوري احاطوي دېوال او لیلیې پخلنځي د ترمیم پروژو پرانیسته هم وکړه.
