د کابل پوهنتون (۲۳۰۰) محصلینو فراغتغونډه د ریاست الوزراء مرستیالانو او د لوړو زده کړو وزارت رهبرۍ په ګډون سره ترسره شوه
د فراغتغونډې په مراسمو کې د ریاست الوزراء اداري مرستیال محترم مولوي عبدالسلام حنفي وویل چې د ا.ا.ا له حاکمیت وروسته شاوخواه ۴۳ زره کسان د ازادې سیالۍ له لارې په امارتي ادارو کې ګمارل شوي او ویې ویل چې موږ همېشه په دې هڅه کې یوو چې له پوهنتونونو څخه فارغانو لپاره د کار زمینه برابره کړو.
دغه راز د ریاست الوزراء سیاسي مرستیال محترم مولوي عبدالکبیر وویل چې اسلامي امارت په هېواد کې له خپلو دیني او ملي ارزښتونو او عنعناتو سره سم د زده کړو شرایط برابر کړي او دا یې مسؤلیت دی چې د خپلو مسلکي کادرونو لپاره د کار زمینه برابره کړي.
نوموړي زیاته کړه چې هېڅ بهرنی هېواد، سازمان او ډله زموږ هېواد نه شي ابادولی او له فارغو شویو محصلینو یې وغوښتل چې د خپل علم او مسلک په وسیله خپل هېواد ودان کړي.
همدارنګه د لوړو زده کړو سرپرست وزیر محترم شیخ الحدیث مولوي نداء محمد ندیم فارغو محصلینو، د هغوی کورنیو او استادانو ته د مبارکۍ تر څنګ ټولنې ته د مسلکي کسانو په وړاندې کولو خوښي وښوده. او فارغو محصلینو ته په خطاب کې یې وویل: «نظام ستاسو خادم دی، تاسو به د هېواد سرحدات، صحت انرژي انجنيري اوداسی نورو برخو کي کار کوي ادارات به ساتئ او پر مخ به یې وړئ.»
نوموړي وویل چې زموږ ټولنه هم د دیني او هم د عصري علومو فارغانو ته اړتیا لري او زیاته یې کړه: «ډېر خوشحاله یم چې په هېواد کې مدرسه او پوهنتون څنګ په څنګ په موازي ډول پر مخ روان دي.»
د لوړو زده کړو سرپرست وزیر وویل چې په نعمتونو کې تر ټولو غوره نعمت علم دی او له محصلینو یې وغوښتل چې ځان علم او کمال ته ورسوي او د خپل کمال په واسطه د خپل هېواد او خلکو خدمت وکړي.
همدا راز د لوړو زده کړو سرپرست وزیر وویل چې د عالیقدر امیرالمؤمنین حفظه الله تعالی د ځانګړي حکم او پیرزوینې له مخې د ټولو امارتي تحصیلي نهادونو هغه استادان چې په بېلا بېلو ولایتونو کې د هېواد د بچیانو د تدریس چارې پر مخ وړي او مسافر دي، اوس د اوسېدو ځای او اعاشه ورته منظوره شوه.
د غونډې په پای کې د کابل پوهنتون له اول تر درېیم نمره او د ۲۲ پوهنځيو اولنمره ګانو ته ستاینلیکونه او نغدي ډالۍ او نورو فارغانو ته تصدیق پاڼې ووېشل شوې.
نېټه: چهارشنبه
۱۴۴۶هـ.ق، د جمادي الاخر۲۳مه
۱۴۰۳هـ.ش، د جدې ۵مه
۲۰۲۴ م، د ډسمبر ۲۵مه
