د لوړو زده کړو سرپرست وزیر په خپل کاري دفتر کې د جاپان له سفیر سره وکتل.
په یاده لیدنه کې د جاپان سفیر تاکویوشي کورمایا د لوړو زده کړو سرپرست وزیر ته په افغانستان کې د خپلو فعالیتونو په اړه معلومات ورکړل او ویې ویل چې کندهار، هرات او ننګرهار ولایتونو ته مو سفرونه وکړل او د افغانستان نورو ولایتونو ته هم د سفرونو پلان لرو. نوموړي زیاته کړه: «اوسمهال په ټول افغانستان کې امنیت د ډاډ وړ دی او دا امن د افغانانو د زړه هیله وه.»
دغه راز د جاپان سفیر د افغانستان په اړه د دوحې درېیمې ناستې ته په اشارې سره وویل چې موږ به نړۍ له افغانستان سره تعامل ته وهڅوو او زیاته یې کړه: «جاپان د افغانستان تر څنګ ولاړ دی، د افغانانو په داخلي چارو کې مداخله نه کوي، دیني، ملي او کلتوري ارزښتونو ته یې درناوی لري.»
همدارنګه د جاپان سفیر په خپلو خبرو کې وویل چې په بېلا بېلو ولایتونو کې مو د واکسین، مخدره توکو پر ضد مبارزې او طبيعي پېښو زیانمنو سره مرستې کړي او له افغانستان سره نورو مرستو ته ژمن یو.
وروسته د لوړو زده کړو سرپرست وزیر شیخ الحدیث مولوي نداء محمد ندیم د جاپان سفیر ته د ښه راغلاست تر څنګ، په افغانستان کې د جاپان له مرستو مننه وکړه. نوموړي د دوحې درېیمه ناسته مهمه وبلله او ویې ویل چې افغانستان له نړۍ سره مثبت تعامل غواړي او دغه تعامل هغه وخت ممکن دی چې د اسلامي امارت استازي په سترو نړیوالو کنفرانسونو او ناستو کې ګډون وکړي او نړۍ ته د افغانستان واقعي تصویر وړاندې کړي.
د لوړو زده کړو سرپرست وزیر مختلفو ولایتونو ته د جاپان د سفیر سفرونه وستایل او ورته ویې ویل چې تاسو د سفرونو پر مهال کولی شئ د افغانستان له پوهنتونونو هم لیدنه وکړئ او په پوهنتونونو کې مثبت بدلون له نیږدې وګورئ.
