یو ایران مېشتی افغان زدکړیال د لوړو زده کړو وزیر لخوا وستایل شو
یو ایران مېشتی افغان محصل چې د ۱۲ پوهنتونونو تر منځ علمي المپیاد کې یې لومړی مقام ترلاسه کړی نن د لوړو زده کړو وزیر له خوا وستایل شو.
دا محصل محمد مسیح نومېږي او په دغه المپیاد کې د ۱۶۷۷ ګډونوالو محصلانو تر منځ د ریاضي څانګې اتل شو.
د لوړو زده کړو وزیر دوکتور عباس بصیر له یاد ځوان سره انلاین خبرې وکړې او د بریا مبارکي یې ده او کورنۍ ته ورکړه او هغه یې د افغانستان ټولنې لپاره ویاړ وګڼه.
لوړو زده کړو وزیر وویل چې دا بریا د ټولو بهر مېشتو افغانانو لپاره یو چارښود (الګو) کېدای شي او دا پیغام وړاندې کولای شي چې افغان ځوانان په ارادې او هڅې کولای شي د کډوالۍ ټولو ستونزو سربېره داسې بریا هم لاسته راوړي.
دکتور عباس بصیر د ایران اسلامي جمهوريت له چارواکو څخه هم مننه وکړه چې محمد مسیح او سلګونو نورو افغان ځوانانو ته یې د تحصیل لار هواره کړې ده.
نوموړي وویل چې لوړو زده کړو وزارت هڅه کوي چې د لوړو زده کړو په برخه کې د نوښتګرو استعدادونو لپاره یو ملاتړیز میکانیزم رامنځته کړي او ورته ځوانان به تر همدې چتر لاندې راولي.
همدا راز یاد ځوان محمد مسیح او د کورنۍ یوه غړي یې د لوړو زده کړو وزیر له پاملرنې او ستاینې څخه مننه وکړه او دغه ګام یې د لا زیات پرمختګ او بریالیتوبونو لپاره د انګېزې پیاوړتیا او ویاړ لامل وګڼه.
په پای کې د لوړو زده کړو وزارت لخوا جوړ شوی مننلیک د ياد ځوان کورنۍ یوه غړي ته وسپارل شو.
