د USAID دفتر او AHEAD پروژې له مسوولانو سره د لوړو زده کړو وزیر ویډیو کنفرانس
د لوړو زده کړو وزیر د USAID دفتر او AHEAD (د افغانستان د پرمختګ لپاره، د لوړو زده کړو د پیاوړتیا پروژه) له پروژې سره په یوه مجازي ناسته کې د هېواد د لوړو زده کړو پیاوړتیا پروګرامونو د ښه پلي کولو لپاره د لازیاتې همغږۍ په اړه بحث وکړ او نظرونه یې سره شریک کړل.
په دې ناسته کې د لوړو زده کړو وزارت علمي معین پوهنمل عبدالتواب بالاکرزي، مالي او اداري معین نور احمد دروېش، د دغه وزارت سلاکارانو عباس عضیمي او پوهنمل احمد ضیا یوسفزي، د تحصیلي چارو کارپوه سید جمیل میر، د یوسایډ دفتر د زده کړو برخې مسوول ډاکټر تیموتي کورټن، د «هېډ» پروژې رییس مایکل بلندیل او همکارانو یې ګډون کړی وو.
د دغې ناستې په پیل کې د AHEAD پروژې د مسوولانو له لوري له یوې ربعې څخه د زیات کاري وخت راپور د لوړو زده کړو وزارت مشرتابه پلاوي ته وړاندې شو، چې لویې برخې یې جنډر، د پوهنتونونو د مدیریتي چارو پیاوړتیا او د بازار له اړتیاوو سره سم د نصاب بیاکتنه او کیفیت لوړول و.
وروسته د لوړو زده کړو وزیر دوکتور عباس بصیر د هېواد لوړو زده کړو په برخه کې د یوسایډ دفتر له مرستو او ملاتړ څخه مننه وکړه او ویې ویل چې د AHEAD پروژه د ۲۰۲۱کال له مارچ میاشتې تر دې مهاله وتوانېده، چې د هېواد لوړو زده کړو د پیاوړتیا په برخه کې ډېر فعالیتونه وکړي او په دې برخه کې د پام وړ لاسته راوړنې لري.
د لوړو زده کړو وزیر هیله وښوده چې په زیاتې همغږۍ د دغه وزارت د پروګرامونو په ځانګړې توګه لومړیتوبونو ته په کتو ګټور ګامونه واخیستل شي. هغه د علمي څېړنو د پروګرامونو په پلي کولو، لوړو زده کړو ته د لاسرسي، په ځانګړې توګه د ښځو د بشري ځواک تولید او د لوړو زده کړو پر کیفیت لوړولو ټینګار وکړ.
همدارنګه د دغه وزارت علمي، مالي او اداري معینانو هم د لوړو زده کړو وزارت د پروګرامونو او د هغو په ښه پلي کولو کې د یوسایډ دفتر د همکاریو د اړتیا په اړه ویناوې وکړې او په دې اړه یې خپلې غوښتنې او اندونه وړاندې کړل.
په دې ناسته کې دواړو اړخونو د پروګرامونو د ښه پلي کولو لپاره نظرونه سره شریک کړل او د لا ډېرې همغږۍ او هر اړخیزو همکاریو ژمنه یې وکړه.
