د لوړو زده کړو سرپرست وزیر په حضور کې د شرعیاتو پوهنځی د ماسټري او دوکتورا پروګرامونو لپاره د افغان نړیوال پوهنتون لومړی دور ازموینه، په کابل پولي تخنیک پوهنتون کې واخیستل شوه.

4/1/1444
11/5/1401
د لوړو زده کړو سرپرست وزیر په حضور کې د شرعیاتو پوهنځی د ماسټري او دوکتورا پروګرامونو لپاره د افغان نړیوال پوهنتون لومړی دور ازموینه، په کابل پولي تخنیک پوهنتون کې واخیستل شوه.   
د یادې ازموینې په پرانیستو مراسمو کې د لوړو زده کړو وزارت مرکزي ادارو یو شمېر رئیسانو، د ازموینو ملي ادارې د اداري او تخنیکي چارو مرستیال، د کابل پولي تخنیک پوهنتون او د افغان نړیوال پوهنتون مسؤلانو ګډون کړی و. 
د لوړو زده کړو سرپرست وزیر الحاج مولوي عبدالباقي حقاني په نوي جوړ شوي افغان نړیوال پوهنتون کې د محصلانو د جذب پروسې له پیل څخه خوښي وښوده او ویې ویل: «دا ډېر د خوشحالۍ ځای دی چې نن د افغانستان په تحصیلي سکټور کې د افغان نړیوال پوهنتون د فوق لېسانس پروګرام د شرعیاتو پوهنځی لپاره د کانکور ازموینه اخیستل کېږي.»   
نوموړي د اسلام په مقدس دین کې د علم زده کړې ارزښت ته په اشارې سره، د هېواد پرمختګ په دیني او عصري علومو کې د تکړه متخصصانو په روزلو کې وباله او زیاته یې کړه چې اوسمهال مو په هېواد کې د ځوانانو لپاره د زده کړو زمینه برابره ده، چې باید پوره ګټه ترې واخیستل شي. 
الحاج مولوي عبدالباقي حقاني وویل چې افغانستان په هره څانګه کې د متخصصینو د روزلو لپاره پرمختللو تحصیلي بنسټونو ته اړتیا لري، تر څو ځوان علمي کادرونه ټولنې ته وړاندې کړي، چې له نېکه مرغه د افغان نړیوال پوهنتون په ایجاد سره ورو ورو خپلې دغې موخې ته د ورنږدې کېدو په حال کې یو. نوموړي له ځوانانو وغوښتل چې له شته اسانتیاوو او چانسونو په پوره استفادې سره د خپل ځان او ټولنې د خدمت جوګه شي.  
وروسته د کابل پولي تخنیک پوهنتون رئیس پوهنوال دوکتور عبدالرشید اقبال او د ازموینو ملي ادارې تخنیکي مرستیال شیخ رحیم الله د علم د ارزښت په اړه خبرې وکړې او د تحصیلي سکټور د پرمختګ او پراختیا په برخه کې یې د لوړو زده کړو وزارت د مشرتابه هڅې وستایلې. 
د یادولو وړ ده چې اړتیا ته په کتو افغان نړیوال پوهنتون د فوق لېسانس پروګرامونو په برخه کې د شرعیاتو، انجنیري، کرنې او طب پوهنځی لري، چې د شرعیاتو پوهنځی په نننۍ ازموینه کې شاوخوا اته سوو کسانو ګډون کړی وو. د یاد پوهنتون د مسؤلانو په وینا چې له دې کسانو به درې سوه کسان د شرعیاتو پوهنځي ته لار پیداکړي.