د لوړو زده کړو سرپرست وزیر د ننګرهار پوهنتون تدریسي روغتون کې د عصبي جراحي برخه د پټۍ په پرې کولو سره پرانیسته.
د لوړو زده کړو سرپرست وزیر الحاج مولوي عبدالباقي حقاني ختیځ زون ته د سفر پر دوام د ننګرهار پوهنتون په تدریسي روغتون کې د عصبي جراحي څانګې پرانیسته وکړه او د دغې مراسمو ترسراوي پر مهال یې د یاد روغتون له مسؤلینو مننه وکړه، چې خپلو اړوندو مسؤلیتونو ته ځیر دي او د روغتون په پرمختګ کې مثبت ګامونه اخلي.
نوموړي همدارنګه وویل ((افغانان په هره برخه کې وړتیاوې لري او دا چې وړتیاوو سره سره بیا هم وروسته پاتې دي، لامل یې د وخت د حکومتونو بې غوري وه، ا.ا.ا د نورو برخو ترڅنګ لوړو زده کړو ته ځانګړې پاملرنه لري او په دې فکر کې دي، چې څه ډول یې معیار برابر کړي او په کور دننه د هېواد اړتیاوې پوره کړي)).
سرپرست وزیر د یاد روغتون مسؤلینو ته په یو لړ مواردو کې لازمې لارښوونې وکړې او همداراز یې له د روغتون له ډاکټرانو غوښتنه وکړه، چې پر دوی د اولس کړی باور وساتي.
د ننګرهار پوهنتون تدریسي روغتون مسؤلینو او منسوبینو په نماینده ګۍ د یاد روغتون سرطبیب پوهنوال ډاکټر همایون چهاردیوال د سرپرست وزیر په ورتګ خوښي څرګنده کړه، د رغتون د تېر یو کال لاسته راوړنو او ترسره شویو چارو په اړه یې هر اړخیز معلومات وړاندې کړل او په ځینو مواردو کې یې له سرپرست څخه اړینې غوښتنې وکړې، چې سرپرست وزیر له لورې د پوره کېدو ډاډ ورکړل شو.
